آمريڪا جي علائقي بريٽن ووڊس ۾ جولاءِ 1944ع ۾ گڏيل قومن جي نگرانيءَ ۾ بين الاقوامي معيشيت بابت معاهدن ۽ راضي نامن جو هڪ سلسلو طئي ٿيو، جنهن تي دنيا جي 44 رياستن راضپو ڏيکاريندي، بين الاقوامي مالياتي فنڊ (IMF) ۽ عالمي بئنڪ (IBRD) جهڙا تمام اهم مالياتي ادارا قائم ڪيا، اها اڳڀرائي ٻن سالن کان برطانيا ۽ آمريڪا وچ ۾ دنيا جي مالياتي نظام نئون روپ ڏيڻ جي حوالي سان جاري مذاڪرات جي نتيجي ۾ حاصل ٿي. مٿين ٻنهي ادارن مان عالمي بئنڪ جي قيام بابت ته ٻنهي ڌرين ۾ مڪمل هم آهنگي هئي، البت IMF جي حوالي سان تمام گهڻا تضاد پيدا ٿيا، ڇاڪاڻ ته برطانيا ۽ آمريڪا وٽ مستقبل جي مالياتي نظام بابت مختلف نظريا ۽ رويا هئا. سندن وچ ۾ هي فرق، آمريڪا طرفان سفيد رٿا (White Plan) ۽ برطانيا پاران ڪينيز رٿا ( (Keynes Plan جي نالن سان عوامي سطح تي پڌرا ڪيا ويا. مبصرن جو چوڻ آهي، ته ٻنهي ڌرين جي وچ ۾ پيدا ٿيل اهي اختلاف، دراصل سندس قومي مفادن جي ٽڪراءَ جو نتيجو هئو. پر جيئن ته ان دور ۾ آمريڪا هڪ مضبوط معاشي ملڪ طور تي ظاهر چڪو هو، تنهنڪري بريٽن ووڊس معاهدن ۾، سندس رٿائن کي وڌيڪ اهميت حاصل ٿي